فكك من اللى يشكك

العنوان غريب شوية مش كده بس اصل هو ده ملخص الحكاية , ابعد عن اللى مضايقك وفارقه , ليه تفضل تضايق نفسك على ناس خسرو مكانتهم عندك , ليه تفضل مضايق من حاجات كان نفسك تعملها بطريقة معينه بس نصيبك انك كنت تغلط فيها .
ما يمكن ربنا كان بيعلمك ازاى تفرق وازاى تختار وازاى تعامل الناس , ما يمكن القرار الى اخدته غلط دلوقتى ده مقدمه لقرار تانى هتاخده بعد كده هيحدد حياتك كلها وساعتها تقدر تختار صح
مهما كنت حاسس ان اللى انت فيه ده صعب ومستحيل ولا يطاق << فأعرف انك احسن من غيرك بمراحل وأعرف كويس ان ربنا بيحبك وعمره ما هيعملك حاجه وحشه , ولو حتى انت شوفت بعينك القاصره دى انها حاجه وحشه < فأعرف انه اختبار من ربنا ولازم تثبت وتبقى قوى وقد الاختبار والمسئولية دى وان إن شاء الله ربما هيكافئك على صبرك ده .

ليه تضايق نفسك – ولو كنت زى حالاتى يعنى حساس شويه – تهلك صحتك على حاجات عددت وناس فارقونا ورحلوا , ليه تقلق نفسك بحاجات مش فى ايدك اساسا "أعرف كويس إن فى حاجات كده بتبقى نصيب , هتحصل وقت ما ربنا يأذن ووقت ما تكون مستعد ليها "

يعنى مثلا عمرك ما هتكون ناجح الا لما تكون مستعد فعلا للمسئوليه دى " ايه ده هو النجاح مسئوليه " اه طبعا مسئوليه ومسئوليه كبيره كمان , امال انت فاكرها كوسه ولا ايه ؟؟؟!!
اه انا معاك إن فى ناس كتييير جدا كمان بتنجح كوسة < بس صدقنى لو هما مش قد المسئولية دى مش هيستمرو كتير , ولو استمروا يبقى طلعوا قدها وكانوا يستهلوها بس الفرصة جتلهم بسهوله شوية مش اكتر .
 ببساطة كده < ابتدى عيش حياتك صح وخطط لمستقبلك باللى تملكه وتقدر تعملة فعلا " مش اللى انت فاكر انك تقدر تعمله ها , عشان انا عارفه النصاحه دى :D  " وارمى ورا دهرك اى معوقات اى ذكريات وحشه اى قرارات غبية "اوعى تنساها بس اتقبلها واتعلم منها "
واى ناس كانوا فى يوم من الايام معطلينك بخناقتهم معاك وبإنك بتهاتى معاهم من غير فايده < ابعد عنهم وطلعهم من حياتك واكسر وراهم زير اسوانى كمان , ولو قابلتهم فى يوم من الايام , عاملهم من على الوش كده ,متتأثرش بيهم كأنهم شوية هوا وراح لحاله.

وابتدى انشغل بنفسك ازاى تسعدها وازاى تبقى ناجح وازاى تحقق اللى بتتمناه .
واسمع للناس وخفف عنهم بس بلاش تعيش تجربتهم معاهم " اتعام منها اه بس بلاش تعيشها" , ما هو مش معقول هتفضل منكد على نفسك 365 يوم فى السنة , يا سيدى كفاية قوى ال 100 يوم اللى بتنكد فيهم على نفسك ,
الباقى بقه حاول تسعد بيه نفسك , حاول تطبطب عليها وتحميها من اللى يأذيها.

ما هو على رأى الهضبة " بالعربى كده محدش يستاهل "

وبقولهالك تانى اهه " فكك من اللى يشكك " :D